Further Information

Fæðingarsögur feðra

Fæðingarsögur feðra er verkefni sem fór af stað á feðradaginn 2019.
Verkefnið er í raun tvíþætt. Annars vegar er markmiðið að vekja athygli á hlutverki og þátttöku feðra í fæðingarferlinu og hinsvegar höfum við safnað fæðingarsögum frá feðrum sem nú stendur til að gefa út í bók. Sögurnar gefa góða innsýn í upplifun feðra af fæðingum barna sinna.

Bók af þessu tagi hefur ekki komið út á Íslandi áður að okkur vitandi.

Sögurnar verða nafnlausar í bókinni en við hverja sögu verður fæðingarár föður, fæðingarár barns og fæðingarstaður, hvort sem það er nafn á sjúkrahúsi eða landið sem barnið fæddist í. Hugsunin með því er að gefa lesandanum smá innsýn í aðstæður viðkomandi.

Við höfum fengið inn 60 fjölbreyttar sögur í verkefnið með mjög ólíkum upplifunum og tilfinningum. Við höfum fengið sögur frá ungum feðrum, eldri feðrum, keisaraskurðum, heimafæðingum, fæðingum á sjúkrahúsi, fæðingum í sjúkrabíl, fæðingum á fæðingarheimili, fæðingum erlendis og í raun eru sögurnar eins fjölbreyttar og þær eru margar.

Við erum ótrúlega spennt að koma sögunum út í bók og nú leitum við því til ykkar til að hjálpa okkur að láta bókina verða að veruleika.

Hver erum við og hvar kviknaði hugmyndin?

Við heitum Ísak Hilmarsson og Gréta María Birgisdóttir og erum par. Saman eigum við 3 börn á aldrinum 0-7 ára. Eina stelpu og tvo stráka.

Ísak er stærðfræðingur og tölvunarfræðingur og starfar í hugbúnaðarfyrirtæki.
Gréta María er hjúkrunarfræðingur og ljósmóðir og hefur starfað við meðgönguvernd, fæðingar og sængurlegu.

Við bjuggum í Uppsala í eitt ár og áttum þá eitt barn. Þá var nægur tími til að ræða um allt milli himins og jarðar. Gréta var að ræða um þátttöku föður í fæðingarferlinu og hvað það væri örugglega flókið að upplifa allar þessar tilfinningar og finnast maður kannski lítið getað gert, þegar stuðningurinn er í raun það besta sem hægt er að gera. Fæðandi kona upplifir alls konar í fæðingunni sinni en líkaminn er hannaður til að gleyma því erfiða svo hver kona fæði ekki bara eitt barn á lífsleiðinni. Feður eru ekki forritaðir til að gleyma og upplifa ferlið kannski á allt annan hátt en fæðandi konan þeirra.
Eftir þetta spjall kastar Ísak fram, ,,hvernig væri nú að gefa okkur feðrum aðeins rými? Er ekki kominn tími á að okkar rödd fái að heyrast?''. Sagt meira í gríni en alvöru. Þetta var bara ekkert svo vitlaus hugmynd. Það eina sem feður eru spurðir eftir fæðingu er hvort það hafi liðið yfir þá eða hvort þeir hafi klippt á naflastrenginn. Annað er bara ekki rætt.

Eðvarð Atli Birgisson sér um hönnun og uppsetningu á bókinni.

Fyrir hvern er bókin?

Fæðingarsögur feðra er bók fyrir alla, eða allavega langflesta. Við vonumst til þess að bókin nái til þeirra sem eiga von á barni, hvort sem það er fyrsta barn eða ekki. Eins hefur bókin mikið sagnfræðilegt gildi og getur því innihaldið verið áhugavert fyrir fólk á öllum aldri. Við vonumst einnig til þess að fagfólk hafi áhuga á að lesa um sjónarhorn feðra í fæðingum. Bókin er svo einnig skemmtileg og áhugaverð fyrir þá sem hafa gaman að mannlegu eðli, þar sem sögurnar bjóða uppá allan tilfinningaskalann.

Áætluð tímalína verkefnisins

Nóvember 2019 - ágúst 2024: Safna sögum frá feðrum + hugmyndavinna varðandi fyrirkomulag bókarinnar
Ágúst 2024 - september 2024: Fjármögnun á útgáfu bókarinnar
Ágúst - október 2024: Yfirlestur, uppsetning, hönnun og prentun
Desember 2024: Dreifing

Viltu segja þína sögu?

Ert þú pabbi? Hefur þú áhuga á að deila þinni fæðingarsögu með okkur? Ef svo er þá máttu gjarnan senda okkur þína sögur á faedingarsogurfedra@gmail.com. Við getum ekki lofað því að sagan komist í bókina (það fer eftir því hvenær við sendum hana í prentun) en mögulega birtum við söguna á miðlunum okkar.

Fylgdu okkur á samfélagsmiðlum

Ef þig langar að kynna þér meira um verkefnið Fæðingarsögur feðra þá hvetjum við þig til að fylgja okkur á samfélagsmiðlum. Þar munum við líka segja frá söfnuninni.

Instagram: //www.instagram.com/faedingarsogur_fedra/
Facebook: www.facebook.com/Faedingarsogurfedra
X (Twitter): www.x.com/faedingarsogur

Eins er alltaf hægt að senda okkur póst á faedingarsogurfedra@gmail.com