Further Information

Bókin inniheldur einfaldar og aðgengilegar útskýringar á byrði þriðju vaktarinnar, afleiðingum hennar og leiðum til lausna. Í bókinni eru rannsóknir settar í samhengi við frásagnir fólks af reynslu sinni af þriðju vaktinni. Markmið bókarinnar er að veita fólki, einkum pörum sem vilja jafna verkaskiptingu, aðgengilegar og hagnýtar upplýsingar til að jafna byrði heimilis- og umönnunarstarfa. Tilgangur útgáfunnar er að stuðla að jafnrétti á íslenskum heimilum í þeirri von að einn daginn þyki körlum jafn sjálfsagt að tæma ruslatunnuna inni á baði og konum þykir að þrífa tannburstaglasið á meðan þær bursta sig.

Höfundar

Hulda Tölgyes og Þorsteinn V. Einarsson eru höfundar bókarinnar. Hjónin hafa síðustu ár verið leiðandi í umræðu og vitundarvakningu um þriðju vaktina. Sáu þau meðal annars um texta- og heimildavinnu fyrir átak VR um þriðju vaktina, hafa gefið út nokkra hlaðvarpsþætti um efnið, skrifað pistla og fjallað um efnið á sínum samfélagsmiðlum: Karlmennskan og Hulda.Tolgyes á Instagram. Þá hafa þau haldið paranámskeið um þriðju vaktina og fjölda fyrirlestra á vinnustöðum um efnið.

Hulda Tölgyes starfar sem sálfræðingur og Þorsteinn V. Einarsson er kynjafræðingur sem starfar við fræðslu, ráðgjöf og fyrirlestra í jafnréttismálum.

Tímalína

Janúar 2021 til júní 2023: Hugmynda-, heimilda- og textavinna.
Júlí 2023: Fjármögnun útgáfu og söfnun frásagna.
Ágúst til september 2023: Ritstjórnarferli, grafík og teikningar.
Október 2023: Yfirlestur, umbrot og próförk.
Nóvember 2023: Prentun og dreifing.

Vertu með

Við erum að safna reynslusögum fólks af heimilis- og fjölskyldustörfum sem við viljum nota í bókinni. Þú getur komið þinni reynslu á framfæri með því að svara nafnlausri könnun hér eða á þessari slóð: https://forms.gle/L63BPKmoHLx1wew57