Further Information

Svarthol

Hljómplatan Svarthol kom út á streymisveitum vorið 2022 og innihélt fimm ný frumsamin lög auk ábreiðu af Plágunni eftir Bubba Morthens þar sem sjálfur Óttarr Proppé heiðraði okkur með nærveru sinni og söngrödd. Flagnað króm í Fossvogi er súrkálshlaðinn gítarveggur eftir Sigga við texta frá Magga, sem vann sjálfur lagið Mál & menning án aðkomu hinna í bandinu (slíkt hefur ekki gerst lengi en er þó ekki einsdæmi í sögu bandsins), Dr Covid er eitt af undarlegri hugarfóstrum Ármanns, Svarthol er lag til að hengja sig við eftir Bjössa og síðast en ekki síst er sannkallaður slagari úr smiðju Aðalbjarnar, Þú ert á mute, sem er ennfremur eina lagið þar sem Gunni heyrist á þessari plötu en það stóð nú til bóta.

Hvítur dvergur

Lagasmíðatörnin sem ól af sér Svarthol var langt frá því að vera þurrausin og platan sú ekki komin út þegar aftur var lagst í upptökur og nú með fullskipuðu bandi. Aftur voru tekin upp fimm ný frumsamin lög og einnig breitt yfir ekki minni listamann en Billie Eilish og hennar þekktasta hittara, Bad guy. Stál og stemnning er byggt á laginu hans Magga af fyrri plötunni og uppfyllir langþráðan draum Ármanns að gera instrúmental lag. Siggi bjó til annan gítarvegg við emoljóð Bjössa, Sefjun og sársauki, en Bjössi lagði líka til kántríslagarann Lilla & Dóra og gruggarann Persónulegt. Taktu þessa slöngu er svo annað skrýtipaunkið við texta Ármanns í undirfurðulegum takti.