Further Information

Draumur um Bamba-gróðurhús

Í starfsemi leikskólans Krakkaborg í Flóarhreppi hefur grænmetisræktun verið að festa sig í sessi undanfarin ár. Hefur sú starfsemi farið fram í bakgarði leikskólans. Það hefur verið draumur okkar lengi að koma upp gróðurhúsi hér á lóðinni til að gera grænmetisræktun viðameiri í starfsemi okkar. Leikskólinn Krakkaborg hefur verið hluti af Grænfána verkefninu um nokkurt skeið og með tilkomu gróðurhúss eflir það starfsemi okkar í þágu umhverfismála og umhverfismenntunnar.

Hvað eru Bambahús?

Bambahús eru gróðurhús sem búin eru búin til úr Bömbum sem eru þúsund lítra vökvatankar úr plasti umvafðir járngrind. Bambarnir eru venjulega einnota en í gegnum Bambahús er þessum tönkum gefið nýtt líf á frumlegan og umhverfisvænan hátt. Bambahúsin eru gott dæmi um umhverfisvæna endurnýtingu.

Umhverfisvitund og menntun til sjálfbærni

Sem Skóli á grænni grein, hefur Krakkaborg unnið að menntun til sjálfbærni. Partur þeirrar menntunar er að rækta eigin mat til að skilja hvaðan maturinn kemur, hvað þarf til að koma matnum á diskinn okkar og hve stórum hluta kann að vera sóað við framleiðsluna og þannig stuðlað að sjálfbærari lífsháttum. Þegar ungir nemendur fá að taka þátt í ræktununni verða þeir um leið opnari fyrir því að smakka grænmeti og prufa sig áfram í upplifun matar. Nemendurnir sjá líka hversu mikil vinna fer í að rækta mat og eru stolt af uppskerunni sinni.

Með tilkomu Bambahúss verður mögulegt að auka fjölbreytni í ræktuninni því ræktunartíminn lengist og auðveldara verður að forrækta ýmsar grænmetistegundir. Þá fá nemendur að rækta ber, blóm og aðrar plöntur.

Nemendur taka virkan þátt í ferlinu frá upphafi til enda; safna í og vinna moltu, setja niður fræ, prikkla út, vökva, og uppskera.

Framtíðar staðsetning Bambahússins

Eins og fram hefur komið höfum við verið að rækta kartöflur og gera alls konar tilraunir í matjurtarækt á enginu okkar sem staðsett er fyrir aftan leikskólalóðinu. Þar höfum við einnig verið með hænur þegar ekki geisar fuglaflensa í landinu.

Það er ætlun okkar að koma Bambahúsinu líka fyrir á enginu okkar. Til útskýra betur má líta á myndina hér að neðan. Til dæmis er kartöflugarðurinn fyrir aftan gróðurhúsið en það sést ekki nógu vel á myndinni.

Vekja skal athygli á því að myndin er mjög samsett.

Margt smátt gerir eitt stórt

Við leitum því til ykkar í þeirri von um að þið sjáið ykkur fært um að styrkja þetta græna verkefni okkar. Við trúum því að draumar geti ræst og vonumst auðvitað eftir jákvæðum viðbröðgum.