Further Information

Vatnsnesvegur, vegur númer 711, hefur töluvert verið í umræðunni undanfarin ár vegna ástands hans. Vegurinn er 70 km malarvegur sem vantar ofaníburð og þegar rignir verða holurnar í honum fleiri en vötnin á Arnarvatnsheiði, sem sagt óteljandi.

Mikil umferð er um þennan veg enda er Vatnsnesið ein helsta náttúruperla landsins. Mikilvægt er að unnið sé að því að öryggi vegfarenda á útvegum landsins verði sem mest en þessu öryggi er því miður ábótavant á vegi 711.

Í mörg ár hafa sveitarstjórn og íbúar á svæðinu beðið stjórnvöld um ráð til bóta en ekki haft erindi sem erfiði vegna skorts á fjármagni. Vissulega hefur árangur náðst að hluta en betur má ef duga skal.

Er ástand vegarins því miður orðið það slæmt að skólabörn sem ferðast veginn tvisvar á dag alla sína skólagöngu ná því ýmsa daga að hrista bæði morgun- og hádegismat upp úr sér á ferðinni til lítillar ánægju bæði fyrir börn og aðstandendur, enda erum vér Húnvetningar algerlega á móti matarsóun á við þessa.

Hér þarf samhent átak því það að keyra veg í svona ástandi upp á hvern einasta dag er engum boðlegt.

Vatnsnesvegur verður að komast framar á samgönguáætlun og gerum við okkur fullkomlega grein fyrir því að til að vegurinn verði boðlegur þarf fjármagn.

Því vill sveitarstjórn Húnaþings vestra hér með hefja söfnun til að hægt sé að byggja upp Vatnsnesveg og aðstoða ríkisvaldið þannig með að þjónusta okkur.

Áætlað er að það kosti 3,5 milljarða króna að byggja upp veginn og malbika hann. Þegar markmiði söfnunar er náð mun upphæðinni verða komið á framfæri við Samgöngu- og sveitarstjórnarráðuneyti með þeirri eyrnamerkingu að fjármunir þeir sem til safnast verði nýttir til uppbyggingar vegar númer 711. Til að koma verkefninu af stað ætlum við að safna 100.000.000 sem ætlaður er í brot af undirbúningskostnaði.

Við treystum á þig kæri styrkjandi, takk!

Fréttir um veginn:
https://www.ruv.is/frett/2021/10/11/bara-malbika-thetta-punktur?fbclid=IwAR25sRDk6aqWDhWS3TpNrtitfnfWu6HV3GkK7939TIrrxdrHI4Zib01CZhM

https://www.visir.is/g/20212164479d?fbclid=IwAR3wb-mbhQr7PZsMAU92XglmhEbcUbnlcPpWyzmdXakHUYf3-npm0xpxw

https://www.ruv.is/frett/vatnsnesvegur-helsta-verkefni-sveitarstjornar

https://trolli.is/vatnesvegur-storhaettulegur/

https://www.icelandreview.com/news/vatnsnesvegur-road-in-extremely-poor-condition/

https://www.hunathing.is/is/moya/page/vatnsnesvegur-jonina-suluvollum-14-nov-2018