Further Information

Að sauma vöggusett þegar von er á erfingja er sérstök tilfinning. Það er eitthvað við það að vinna að verkefni sem smám saman verður að fallegum grip sem kannski á eftir að ganga milli kynslóða.

Hugmyndin að vöggusettinu fæddist upp úr hruni þegar allir voru að bjarga Íslandi með prjónaskap og sláturgerð. Á útsaumsnámskeiði sem ég sat voru þátttakendur hvattir til að nýta útsauminn til að búa til nytjahluti, til að prófa eitthvað annað en ullina.

Vöggusettið kom fljótt upp í hugann því að það er gripur sem endist mun lengur en útsaumuð handklæði eða smekkir svo að eitthvað sé nefnt. Útsaumur er almennt ekki ódýr og því er mikilvægt að gripurinn sé fyrirhafnarinnar virði. Hér eru vögguvísurnar myndskreyttar af íslenskum listamanni og mikil vinna lögð í að finna réttu litina.

Og svo eigum við óþrjótandi fjársjóð af vögguvísum og bænum sem gaman væri að setja á vöggusett í framtíðinni. Innan sumra fjölskyldna hafa sömu vísurnar gengið kynslóð fram af kynslóð, sem er mikill menningararfur.

Dódó og dumma,
dagur er fyrir sunnan.
Sástu ekki hvítan blett
á bakinu á honum krumma.

Þetta var raulað í minni fjölskyldu við lagið Bí bí og blaka. Er eitthvað sambærilegt sem hefur verið sungið í þinni fjölskyldu?

Það sem hratt hönnuninni af stað var þegar mér var gefin stór gjöf, gamall konfektkassi fullur af allskyns litum og garnafgöngum frá aldraðri konu sem var hætt að sauma út vegna sjóndepru.

Með alla þessa liti fyrir framan mig sem hrópuðu hver á annan, þá var eina vitið að prófa að blanda þeim saman. Því eru alltaf tveir litir saman í nálinni sem renna saman í eitthvað alveg nýtt, þar sem annar gefur birtu en hinn skugga.

Íslensku vögguvísurnar eru menningararfur sem gaman er að halda á lofti. Þær þykja margar ansi dimmar og angurværar en einmitt þar liggur gjarnan fegurð þeirra.

Útsaumuð vöggusett ganga gjarnan milli kynslóða og öðlast þannig mikið tilfinningalegt gildi, ekki síst ef þau eru saumuð af einhverjum sem okkur þykir vænt um.

Vöggusettið frá Barnabóli er útsaumspakki með bómullargarni og leiðbeiningum.
Sængurverið er 70x100 cm og koddaverið 35x40 cm auk 3 cm kants.
Það kemur í bómullarpoka sem einnig má sauma í, því fara engar umbúðir til spillis.

Hér er kominn nytjahlutur sem kostar minna en veggmynd eða dúkur en hefur mun meira gildi til lengri tíma.

ÚTSAUMSAÐFERÐ
Vöggusettið er saumað með kontórsting sem einnig er stundum kallaður afturstingur, varpleggur og fleira. Þetta er gamalgróin útsaumsaðferð og gjarnan ein sú fyrsta sem börn læra.

Við hönnunina var horft til þess að saumaskapurinn væri sem einfaldastur en auðvitað er ekkert því til fyrirstöðu að vanir saumarar leiki listir sínar.

„Varpleggur (varpsaumur) er ýmist saumaður eftir áteiknuðum línum eða eftir þræði. Algengast er að sporið sé tekið þannig að nálin komi upp þar sem henni var stungið niður í næsta spori á undan. Nálin kemur ávallt upp sömu megin við sporin.“

https://arnastofnun.is/is/greinar/kontorstingur

ENGLISH SUMMARY
The Baby Bed Sheets from Barnaból are an embroidery package with DMC yarn and instructions, in a reuseable cotton bag.

The sheets are printed with common Icelandic lullabies, illustrated by Elin Elisabet Einarsdottir. The cotton bag is also printed on.

The yarn is blended, that is, there are two colors in every strand that work together like a soprano and alto, guitar and bass, strength and softness.

The embroidery is simple back stitch, as shown above.

All material is 100% cotton, naturally.