Further Information

Baldvin Viggósson stríddi við krabbamein í áratugi, en þrátt fyrir hetjulega baráttu sigraði meinið og Baldvin lést 10. sept. s.l. Baldvin var ekki maður margra orða, en átti þó þann draum að gefa út bók með hluta af þeim ljóðum sem hann hafði samið í gegnum tíðina og ætlar eiginkona hans, Kristín Snorradóttir, að láta þann draum rætast.

---

Kveðja frá Stínu

Í minningu ástkærs eiginmanns míns, Baldvins Viggóssonar, sem lést fyrir aldur fram eftir hetjulega baráttu við krabbamein í 26 ár gef ég út hluta af ljóðasafni hans, en það var eitt af því sem hann ætlaði að gera áður en hann kvaddi þessa jarðvist.
Ljóðin ná yfir hluta af hans/okkar æviskeiði og eru í raun lífsins saga um ást, þjáningu, trú, fegurð, dimmuna og ljósið bjarta. Persónuleg ljóð sem hafa gefið mörgum fegurð inn í líf sitt og sannarleg ást hans til mín, barnanna og lífsins.

Sé þig þegar minn tími kemur.
Stína.

---

Nokkur ljóð úr bókinni

Lífshlaup fíkils

Hann var eins og hver annar unglingspiltur
hvergi banginn stundum villtur
Hann hafði sýn á framtíð bjarta
þor og þrek var í hans hjarta

Hann var oft bæði hugsi og dreyminn
einn dag hann skyldi sigra heiminn
Hann myndi há hildi marga
heiminum til að bjarga

En svo hún breyttist hans unga æska
hvarf með öllu hans mikla gæska
Það var þegar hann dópið fann
þá víman ei af honum rann

Hjá honum nú allt lá niður á við
næsti skammtur hans varð eina bið
Móðir spyr hvað varð um soninn
það eina sem hún á er vonin

Hann breyttist úr góðum dreng í hrotta
núna er hann ræsisrotta
Á daginn í skugga hann sig felur
um nætur hann fer út og stelur

Finnur greni til að höfði halla
neðar og neðar hann er að falla
Það sem er hans stærsta mál
er næsti skammtur með sprautu og nál

Þegar fráhvörfin hann mjög svo kvelja
líkama sinn hann þá fer að selja
En það dugir honum lítið samt
rétt svo fyrir næsta skammt

Svona er hans lífsins saga
skakkur nætur sem og daga
Móðir núna syrgir soninn
því í nótt hún dó víst vonin

Lífshlaup sitt hann var að klára
hann samt aðeins nítján ára
Banameinið það var fíkn
dauðinn varð hans lausn og líkn


Tveir úlfar

Í hugskoti þínu berjast úlfar tveir
Annar góður - hinn grimmur
annar bjartur - hinn dimmur
Þeir takast á af krafti fullum
En hvor þeirra fer með sigur
hvor þeirra verður af þínum fóðrum digur
Það er sá sem að þú elur
það er hann sem að þú velur


Önd

Ó hve fagur er dagurinn
sem nú fer í hönd
Í dag er ég frjáls
í dag er ég önd