Further Information

Við erum öll Keflavík

Við gerum okkur grein fyrir því að þetta eru erfiðir tímar, það finnum við á eigin skinni. En við verðum einfaldlega að snúa vörn í sókn og halda áfram. Hverju sem á dynur á okkar líf og okkar störf þá má aldrei leggja árar í bát. – Því við erum öll Keflavík.

Það þarf ekki að hafa mörg orð um það hversu mikið tekjutap hlaust af því að Nettómótinu var aflýst og að úrslitakeppnin í Dominos deild karla og kvenna fór ekki fram, þetta vita allir. Allir þeir sjálfboðaliðar sem leggja blóð, svita og tár í að halda úti starfi fyrir alla okkar iðkendur þurftu því að horfa upp á það að sú mikla vinna sem lögð hafði verið í barna- og unglingastarf sem og meistaraflokkana var að miklu leyti til einskis. En allir ætla að halda ótrauð áfram. Því við erum öll Keflavík.

Körfubolti er liðsíþrótt og þá er ekki bara átt við þjálfara og lið. Stuðningsmenn hér í bæ hafa margsinnis sýnt það og sannað að þeirra þáttur er svo gríðarlega mikilvægur og eru því stór þáttur að þeirri liðsheild sem okkar félag er. Því við erum öll Keflavík.

Við trúum og treystum á samtakamátt bæjarbúa hér í Sunny Kef. Það er einlæg von okkar og trú að þetta verkefni sem við ætlum nú að sigla úr höfn heppnist vel. Stjórn körfuknattleiksdeildar Keflavíkur vil þakka öllum sem á einn eða annan hátt lögðu sitt á vogarskálarnar í því að aðstoða okkur í ár og síðustu ár. Það hefur margsannast að margar hendur vinna létt verk og við erum heppin að eiga svo öflugan hóp velunnara og stuðningsmanna. Því við erum öll Keflavík.

Verkefnið sem við höfum ákveðið að setja af stað er Karolina Fund söfnun. Búið er að stilla upp fjölbreyttum pökkum sem stuðningsmenn geta fengið gegn því að styrkja. Í þessu verkefni þurftum við að stilla upp lágmarksupphæð en við bendum góðfúslega á að það má alveg safnast meira. Allir þeir sem styrkja fá sjálkrafa aðgang að Upprisuhátíð Keflavíkur sem haldin verður um leið og aðstæður í okkar þjóðfélagi leyfa. Á því kvöldi lofum við frábærri skemmtun, þar sem við gerum upp síðasta tímabil, störtum því næsta og umfram allt njótum lífsins. Eðli máls samkvæmt er ekki hægt að festa dagsetningu á slíkan viðburð en þið fáið fyrst að vita af því þegar af því verður.