Further Information

Ung kona stendur í svartri fjöru. Fæturnir, þungir og þjáðir, grafa sig ofan í svartan sandinn. Hún hefur enga skó á fótunum og klæðist engu nema þunnum hvítum kjól, sem flöktir í sjávargolunni. Hárið liðast niður með herðum hennar eins og gullin foss og hjarta hennar, þungt sem blý, fær hana til að sökkva enn dýpra í sandinn. Hún lítur upp, til himins, út sjóndeildarhringinn og sér ekkert. Eftir langa, hægfara göngu í svörtum sandinum, tekur hún sín síðustu spor í átt að fjöruborðinu. Kaldur sjórinn rennur mjúklega yfir tærnar svo að iljarnar herpast saman. Kuldinn er henni ekkert, hún hefur hvorki fundið kulda né hita um langt skeið. Hún horfir aftur fyrir sig og virðir fyrir sér útjaðar bæjarinsí hinsta sinn. Hún grætur ekki, því hún er löngu hætt að geta grátið. Hún stígur taktföstum sporum í svarta sandinn þar sem hann er blautastur. Hún gengur í sjóinn.

Vatnið, gríman og geltið er saga af þunglyndi, sjálfsvígstilraunum, dulúð vatnsins, grímunum sem við berum öll og geltandi, svörtum hundum.

Sagan er byggð á upplifun höfundar á geðsjúkdómum og er frásögnin litrík og ljóðræn á sama tíma og hún kryfur geðheilbrigðiskerfið, bataferlið og lífið sjálft.

Silja Björk heiti ég og er 27 ára skúffuskáld og ötull talsmaður geðheilbrigðismála. Ég hef skrifað fjölda greina um málefnið, veitt ótal viðtöl og var þátttakandi í sjónvarpsþáttunum Bara geðveik, sem voru sýndir á Stöð 2 haustið 2016. Ég er einnig einn stofnandi #égerekkitabú samfélagsmiðlabyltingarinnar og hélt fyrirlestur á TEDx ráðstefnu í Hörpu vorið 2014, um upplifun mína af sjálfsvígshugsunum. Fyrirlesturinn er titlaður "The Taboo of Depression" og má sjá hér að neðan.

Ég hef haldið fjölda fyrirlestra í skólum, fyrirtækjum og ráðstefnum um málefni geðheilbrigðis og býður ég upp á slíka fyrirlestra í áheitunum hér að ofan. Einnig býð ég upp á upplestur úr verkinu sjálfu og náist söfnunarmarkmiðið verður efnt til stærðarinnar útgáfuteitis til að fagna!

Fyrirlestarnir henta vel fyrir hópa, t.d. í framhaldsskólum, efstu bekkjum grunnskóla eða fyrir alla forvitna sem vilja fræðast meira um geðheilbrigði og forvarnir á persónulegum nótum.

Upplestur úr verkinu sjálfu hentar einnig vel í slíka hópa eða saumaklúbbinn og þannig getum við rætt okkar á milli innihald bókarinnar á óformlegan og persónulegan máta.

Ég held úti vefsíðu, www.siljabjork.com, þar sem hægt er að kynnast mér og mínum verkefnum betur.

Með því að styrkja útgáfu bókarinnar ertu ekki aðeins að láta draum ungrar konu rætast heldur stuðla að eflingu íslenska bókmenntaarfsins og forvörnum í geðheilbrigðismálum.

Söfnunin nær yfir allan praktískan kostnað við bókaútgáfu, svo sem ritstjórn, prófarkarlestur, hönnun og umbrot til þess að tryggja það gæðabókmenntir í fallegu umbroti komist til skila til þeirra sem áheita. Við leitum að fagfólki til að aðstoða við þessi verkefni á lokastigi útgáfunnar!

Endilega hafðu samband ef einhverjar spurningar kvikna.

Takk kærlega fyrir stuðninginn!