Further Information

FLEKASKIL
eða
nokkrar hugleiðingar út frá jarðfræði og kenningum
Alfreds Wegeners sem hvílir frosinn á miðjum aldri
djúpt í Grænlandsjökli

Hvítir miðaldra karlmenn eru mikið í fréttum þessa dagana og ekki alltaf af góðu tilefni. Skemmdu eplin fá verðskuldaða athygli og viðeigandi fordæmingu en fáir velta fyrir sér líðan og ástandi hinna eplanna í tunnunni.
Í Flekaskilum er reynt að gægjast undir yfirborðið, skynja líðan ljóðmælanda og velta upp svörum við áleitnum spurningum.

Hver er sprettan á andlegum akri miðaldra karlmanns sem skynjar eigin dauðleika handan við hornið? Á hvaða vegferð er hann? Hvernig líður honum? Verður jarðarförin fjölmenn?

Alfred Wegener og örlög hans urðu höfundi innblástur og hugtök jarðsögunnar slá tóninn á vegferð hans frá vonleysi til vonar.

Handritið var þriðjungshluti af meistararitgerð í ritlist við Háskóla Íslands haustið 2018, undir leiðsögn og ritstjórn Sigþrúðar Gunnarsdóttur, þaulreynds ritstjóra hjá Forlaginu.

Ljóðabókin Flekaskil inniheldur 27 ljóð í þremur köflum. Bókin verður fallega innbundin í smáu broti (18x11 cm).

Ljóðabókin er niðursettu fyrir ykkur sem styrkið útgáfuna, á krónur 2.890 m. vsk og heimsendingargjaldi (bókin mun kosta 3.690 í almennri sölu á www.hugall.is í nóvember).

Hér að neðan eru tvö sýnishorn:

ELDFJALL

Wegener sagði aldrei
að karlar væru eldfjöll
og konur höf

en þegar glóandi tungan
sígur
í vott djúpið

bullsýður
uns hraunið storknar
í steindri grettu

Sum eldfjöll
eru kulnuð

------------------------------

LAUSN

Dropinn þekkir steininn

Annar stíflar
og hinn holar

uns flæðir
um ódáinsakur

Ég stend
með lífið
í lúkunni

og treysti
á tárið