Further Information

Útgáfutónleikar

Hljómsveitin vill bæta við aukaverðlaunum fyrir ALLA sem styrkja ef söfnunin nær 120%

Ókeypis inn á útgáfutónleika fyrir ALLA sem styrktu útgáfuna og þeir sem eiga marga diska mega bjóða það mörgum með sér. Staður og stund auglýst síðar.

Skýjaborg

Sem fyrsta tóndæmið af plötunni gefum við lagið Skýjaborg sem verður fyrsta lagið á plötunni. Vídeóinu fylgja myndir og texti.

Lög þyngdaraflsins

Umslagið prýðir Isaac Newton, einn hinna upprunalegu meistara dauðans.

Tíu laga plata

Meistarar dauðans eru nú sem fyrr ósmeykir við allskyns tilraunastarfsemi í lagasmíðum og stefnum. Flest laganna eru þungarokkslög eða í þyngri kantinum, en aðrar stefnur og straumar blandast saman við og er sveitin spennt að sjá hvernig fólki líkar.

Hljómsveitin er öll virk í lagasmíðunum en sem fyrr er það Ásþór Loki sem semur textana.

Lágmarksupphæðin er €7.000!

Eins og aðrar safnanir hér á Karolinafund er þessi "ALLT eða EKKERT" sem þýðir að söfnunarféð skilar sér öll til Meistara dauðans ef lágmarksupphæðin næst, annars ekkert. Því er gríðarlega mikilvægt að lágmarksupphæðin náist, en hún er €7.000.

Meistarar dauðans ákváðu fljótlega eftir gerð fyrstu plötunnar að tryggja aðdáendum hljómsveitarinnar að þeir þurfi ekki að bíða mánuðum saman eftir afhendingu. Hún er því tilbúin og platan fer í framleiðslu um leið og söfnuninni lýkur!

Með þínum stuðningi verður það í ágúst!

Upptökur í Hljóðverki

Er leita þurfti að nýjum upptökumanni fyrir plötuna bentu margir á Einar Vilberg í Hljóðverki og þar er óhætt að segja að fagmennska sé í fyrirrúmi enda Einar margreyndur í tónlistarbransanum.

Stjarna hans sem upptökustjóra og stúdíósins hans Hljóðverk, rís hratt á íslenskum rokkhimni en hann hefur nýlega tekið upp Króniku og Skálmöld svo einhverjir séu nefndir.

Átta frumsamin lög

Lögin eru öll samin eftir að fyrsta platan kom út og nýjustu lögin voru kláruð rétt fyrir upptökur. "Opinberunarmókið" var það fyrsta sem hljómsveitin kláraði og flutti og segja má að það hafi lagt línurnar fyrir metnaðinn við gerð "Lög þyngdaraflsins" bæði í textagerð, uppbyggingu og spilamennsku.

Ásþór hefur ævinlega unnið textana á blaði og skráð í bók áður en þeir skila sér á stafrænt form. Á því varð engin breyting á Lög þyngdaraflsins, en hér eru til dæmis drögin að Nyarlathotep sem var einna síðast á dagskrá með aðfinnslum og kroti.

Tvær sjóðheitar ábreiður

Meistarar dauðans flytja "Af ávöxtunum skuluð þið þekkja þá" með Jónasi Sigurðssyni og ritvélum framtíðarinnar, en sú hljómsveit er í miklum metum hjá Meisturum dauðans. Þungur og grípandi takturinn og stefið greip strákana strax og þeir spila það jafnan á tónleikum við mikinn fögnuð.

Það stóð ekki á Jónasi að veita vilyrði sitt fyrir að þeir fengju að gefa lagið út á plötu, jafnvel þótt það hafi ekki enn komið á plötu með Ritvélunum. Meistarar dauðans útsettu það og þyngdu nokkuð, bættu við Hammond og fengu meðal annars Jónas sjálfan sem sérstakan gest í raddir.

Hin ábreiðan er "Reddarinn" sem er áður óútgefið lag eftir föður þeirra Ásþórs og Þórarins. Meistarar dauðans brettu upp ermarnar og útsettu það ítarlega, en eina demóið sem var áður til af því var söngur yfir kassagítar. Þeir nutu dyggrar aðstoðar bræðranna Freys og Kára Hlynssona og saxófónleikarans Svavars Ágústssonar í stúdíóinu, en þeir eru með annan fótinn í Meisturum dauðans og koma oft fram með þeim á tónleikum.

Íslensku Tónlistarverðlaunin 2015

Árið 2015 söfnuðu Meistarar dauðans fyrir fyrstu plötu sinni hér á Karolinafund með góðum árangri. Þá náðu þeir áfangatakmarki #2 sem var136% af lágmarksupphæðinni. Frumburðurinn var tekin upp, kláruð og gefin út í nóvember sama ár.

Sú plata hlaut tilnefningu til Hinna íslensku tónlistarverðlauna sem Rokkplata ársins og að sjálfsögðu vonast strákarnir til að hljóta þann heiður aftur fyrir Lög þyngdaraflsins!

Hljómsveitin er full þakklætis til þeirra sem studdu þá söfnun og vonast eftir því að njóta sama trausts aftur við framleiðslu á Lögum þyngdaraflsins.

Glefsur frá útgáfutónleikunum 2015

Meistarar dauðans slógu útgáfutónleikum sínum saman við Rokkjötna 2015 þar sem þeir hituðu upp fyrir Mastodon. Þar fengu þeir í lið með sér góða gesti á sviðinu þ.á.m. Birki Blæ á gítar sem nú í vor vann Söngvakeppni Framhaldsskólanna og Magna Ásgeirsson.

Rokkjötnum fylgdi svo Eistnaflug 2015, tónleikaröð á Austurlandi og fjöldi tónleika í Reykjavík síðan þá.

Hér fylgir örstutt myndskeið frá Rokkjötnum 2015 í Valsheimilinu.