Further Information

JAK

Síðan ég man eftir mér hefur tónlist verið minn besti vinur, sálufélagi, skjól og rými fyrir útrás. Þá gildir einu hvort ég er að hlusta á tónlist eða skapa hana eða túlka lög annara. Í gegnum tíðina hef ég komið að mörgum verkefnum og verið í mörgum hljómsveitum. Síðan 2011 hef ég verið meðlimur DIMMU sem hefur verið ein afkastamesta hljómsveit á Íslandi undanfarin ár, með þrjár breiðskífur, slatta af live DVD auk tónleikaplötu með Bubba Morthens.
Þar á undan hef ég gefið út plötur með Douglas Wilson og THINGTAK. Þessi tvö síðarnefndu bönd eiga það sameiginlegt að hafa aldrei fengið byr undir vængina til að halda flugi.

Auk þess að skapa tónlist með vinum mínum hef ég tekið þátt í fjölda tónleikasýninga og heiðurstónleika. Að endingu má ekki gleyma að minnast á samstarf okkar Andra Ívars og Föstudagslaganna sem hefur hlotið frábærar viðtökur hvar sem við stígum niður fæti.

Öll þessi verkefni eiga það sameiginlegt að ég hef notið þeirra í botn og er þakklátur fyrir þau forréttindi að geta tvinnað saman mitt helsta áhugamál og atvinnu í samstarfi við frábært fagfólk og vini.

Það hefur lengi blundað í mér að gefa út plötu í eigin nafni og eftir margra ára bið hef ég ákveðið að núna sé tími til kominn að láta til skara skríða.
Í upphafi var ég ekki viss hvert ég vildi stefna að öðru leiti en því að ég ætlaði ekki að gera þungarokksplötu.
Eftir að ég kynntist Dóra úr Legend fóru hjólin að snúast. Við ákváðum að hefja samstarf og höfum undanfarið ár hreinsað til í ruslakistum hvors annars. Úr verður tónlist sem er í senn blaut, köld, falleg og melódísk.

Við fengum til liðs við okkur úrval af frábærum hljóðfæraleikurum. Þar ber fyrstan að nefna vopnabróður minn úr DIMMU trommarann Birgi Jónsson. Næstan ber að nefna Hálfdán Árnason bassaleikara sem hefur m.a. Verið í hljómsveitunum Sign, Different turnes og Himbrimi. Að lokum fengum við til liðs við okkur frábæran gítarleikara sem heitir Birkir Rafn Gíslason. Hann hefur komið víða við á sínum ferli m.a. Í Himbrimi og Jónas sig og ritvélar framtíðar. Halldór Á Björnsson (Dóri) sér svo um píanó og aðra hljóðgerfla sem mynda hljóðheiminn í kringum bandið. Ég hef einnig notið aðstoðar Magnúsar Þórs Sigmundssonar við textagerð.

Við höfum nú þegar sett lagið “Flóttamaður” í spilun á helstu miðla og hefur það fengið frábærar viðtökur. Fleiri lög munu svo fylgja í kjölfarið á næstu vikum. Upptökur á þeim 10 lögum sem munu prýða plötuna eru langt komnar og erum við mjög sáttir við útkomuna.

Ólöf Erla hjá Svart Design mun sjá um alla hönnun sem verkefninu tengist. Með henni í liði er annar vopnabróðir minn úr Dimmu bassatröllið Silli Geirdal. Formlegur útgáfudagur er ekki kominn ennþá, en stefnan er tekin á miðjan maí og í kjölfarið verður plötunni fylgt eftir með tónleikum víða um land.

Við erum stórhuga og metnaðarfullur hópur sem umvefur JAK verkefnið.

Svona verkefni er þungt í vöfum og síður en svo sjálfsagt að þetta gangi upp. Við vitum að við erum með gull í höndunum og höfum því ákveðið að leita eftir stuðningi í gegnum Karolina fund til að fjármagna hluta verkefnisins.

Með von um góðan stuðning og loforði um frábæra plötu.

Ykkar vinur: Stefán Jakobsson (JAK)