Further Information

Höfundar hafa báðar verið virkar í hinsegin starfi um árabil og hafa orðið áþreifanlega varar við að það vantar íslenskt efni þar sem hugtök eru skýrð og hinsegin málefni rædd.
Við tókum málin í okkar eigin hendur og fengum styrk frá Þróunarsjóði námsgagna og Reykjavíkurborg til að vinna efnið. Nú viljum við gjarnan gefa öllum aðgang að efninu með því að setja það fram á skilvirkan hátt á vefsíðunni Hinseginfráatilö.is. Við höfum þegar fengið teymi hjá frumkvæði.is til að standa að gerð síðunnar.

Við sjáum fyrir okkur að efnið nýtist bæði byrjendum og lengra komnum og sé um leið inngangur að hinsegin fræðum sem er fræðigrein í örum vexti hérlendis sem erlendis. Þannig myndi vefsíðan bæði nýtast í kennslu á framhalds- og háskólastigi auk þess að vera brunnur þekkingar fyrir almenning, aðstandendur hinsegin fólks og hinsegin fólk sjálft.
Til að setja efnið í persónulegt samhengi höfum við einnig safnað innslögum og reynslusögum frá íslensku hinsegin fólki.

Efnið hefur þegar verið notað með góðum árangri við kennslu í kynjafræði við Kvennaskólann. Í umsögn nemenda segir meðal annars:
Það var svosem margt sem ég hafði ekki svo mikið sem heyrt minnst á fyrr en í Hinsegin handbókinni, t.d. jaðarkynverund, einkynhneigð, fjölkynhneigð, skoliosexuality, aromantic, kynsegin, butch, normatívur, margþætt mismunun, öráreitni, bleikþvottur, queerbaiting, hinsegin saga. Það er samt gott að vera búin að komast að því hvað maður vissi takmarkað.

Með þinni hjálp kemst síðan Hinseginfráatilö.is loftið von bráðar! Takk fyrir stuðninginn.